Carmen Mola?
O sábado descubríase durante a celebración dun famosérrimo premio literario que tras da escritora superventas Carmen Mola agochábanse tres señores. As redes arderon. Esquecimos a pandemia e o volcán, a chuvia de bonos culturais e demostramos que tamén sabemos de literatura. Miles de opinións serviron para chegar a preguntarnos, con ton preocupante: se fan falla tres tipos para escribir unha novela, cantos se precisan para vendimar?
Jane Fonda contra o polbo
A mítica Jane Fonda disparou toda a súa solidariedade para situarse completamente en contra dos restaurantes que propoñen polbo na súa carta. Di que son animais intelixentes. Que nolo digan a nós. Jane ten toda a razón. É imposible debater cun polbo cuberto de aceite de oliva e pimentón. Sempre gaña. Que veña Jane Fonda a O Carballiño e que tente discutir con algo así.
Os ósos de Apóstolo dan para un caldo
Escoitaríades iso de que ao mellor os restos do Apóstolo non son, como críamos, de Santiago Menor, senón de Santiago Maior. En realidade, a nós o único que nos importa é que se leven a tuna.
Ferrín e Murakami: o Nobel que non chega
Un ano máis, Xosé Luis Méndez Ferrín é o autor galego que queda sen o Premio Nobel de Literatura. É o noso Murakami. Ogallá algún día cando alguén anuncie dende Estocolmo que Ferrín é o premiado, vaian recoller o Nobel tres señoras palilleiras de Camariñas.
