Novas

Ana Kiro e Ataque Escampe

ANA KIRO E ATAQUE ESCAMPE

O tema orixinal, con música de Mario Sellés e letra de Vicente Beltrán, encádrase na primeira etapa da carreira de Ana Kiro, na que gravaba para o selo Belter en castelán. Este selo estaba asociado a cantantes yeyé como Karina ou Salomé. Nesta época, a cantante nada en Castañeda (Arzúa), experimentou con diferentes estilos musicais entre os que podemos atopar boleiros, rancheiras ou cancións con producións máis próximas ao pop mediterráneo (que poderían recordar a outras artistas do momento como Rita Pavone). Editouse nun single con “Siempre te amaré” como Cara B.

Un dos obxectivos principais da banda á hora de afrontar este proxecto foi manter o poderío co que a cantante melódica contaba. Foi gravada e mesturada por Carlos Quintá n’As Gonzalinhas en xuño de 2021 coa colaboración de Alberto Quintá. O encargado da produción artística foi o Hevi (Malandrómeda e Fluzo.) e a masterización correu a cargo de Carlos Hernández Nombela (produtor de bandas de gran recoñecemento como Los Planetas, Triángulo de Amor Bizarro, Los Enemigos ou Ariel Rot). 

O proxecto “Puro Deleite”, un recompilatorio no que máis dunha ducia de bandas e artistas do panorama musical galego reinterpretarán temas clásicos da música pop galega, dará a luz un novo tema de xeito mensual ata final de ano, cando se editará un disco.

 

Tamén podes escoitar “Por última vez” de Ataque Escampe en Spotify.

Este mes de xaneiro, o grupo compostelán Ataque Escampe publicaba o sinxelo “Por última vez” para o recompilatorio de clásicos galegos “Puro Deleite”. Unha reinterpretación sen perder a esencia pop da canción coa que Ana Kiro participou no Festival de Benidorm no ano 1967 e que, curiosamente, cincuenta e cinco anos despois ten ao trío galego Tanxugueiras como representantes da música galega.